嚟到2020年最後幾日，小米依然有搞作，壓軸發佈咗旗艦機小米11，等我哋帶大家睇下！

小米11係第一款使用全新高通 Snapdragon 888 處理器嘅手機，呢款旗艦級處理器採用咗 5nm 製程生產，整體比上一代效能提升 25%，新增嘅 Cortex-X1 核心最高主頻更加可達 2.84GHz。內存就提升到 6400Mbps 速度嘅 LPDDR5，暫時係 Android 手機之中最快嘅內存配置。螢幕上，小米 11 配備咗 6.81 吋 2K 螢幕，有120Hz 嘅刷新率，亮度可達 1500nit，加上最新一代玻璃，抗跌性比上一代提升 1.5 倍，耐刮性亦提升 2 倍。

拍攝方面，小米 11 前鏡配備 200 萬像素廣角鏡頭。而後置嘅鏡頭就配備 1 億像素主鏡頭，1300 萬像素嘅123 度超廣角鏡頭，同埋 500 萬像素嘅 50mm 長焦微距鏡頭，無論影風景、人物或微距都十分出色，最高仲可以支援 8K 影片錄製。除此之外，佢哋仲搵咗 Digital Domain 首席調色師嚟幫佢哋設定咗 8 款電影濾鏡，等大家影相都可以有電影嘅感覺。

外觀上，小米 11 比上一代嘅變化算明顯，改用咗左上角開孔嘅四曲面螢幕，後置相機區就採用咗類似iPhone 嘅圓角方形。成部機整體厚度只有 8.06mm，重 196g，非常之輕。而內置電量為 4,600mAH，支援55W 有線同 50W 無線充電，全日開 5G 都夠晒用。另外，小米 11 亦都配備 Harman Kadon 調音嘅雙喇叭，一部機可以同時連接兩個藍牙音訊裝置，屏下指紋仲增加心率檢測功能，方便晒我哋留意自己嘅健康。

小米 11 有三款選擇，分別係 8GB Ram 加 128GB 或 256GB 儲存空間，同 12GB RAM 加 256GB 儲存空間，個別售價為 3999 人民幣、4299 人民幣同 4699 人民幣，有黑、白、藍、煙紫、卡其共 5 款顏色，全部支援 5G 同 wifi 6 加強版，於 2021 年 1 月 1 日正式發售，不過香港同國際版就未有消息，可能要等多陣喇。

另外，小米 11 標準包裝並無包括充電器及數據線，不過就同時推出連同相關嘅套裝，價錢一樣，消費者可以自由選擇，更加環保。