隨住無線鍵盤嘅普及，Logitech近年都推出咗唔少高質素嘅無線鍵盤，而近期佢哋就推出咗一款新嘅人體工學無線鍵盤－ERGO K860，今日就同大家介紹下！

呢款 ERGO K860 同其他普通鍵盤唔一樣，佢擁有弧形嘅外貌，主要鍵盤區域位置會拱起，令用家使用時可以減省不必要嘅腕關節翻轉動作，令打字姿勢更加自然。佢嘅設計理念在於減輕用家手腕同前臂嘅勞損，同時使到手部、肩膊更加輕鬆。呢個鍵盤亦都通過美國人體工學協會嘅認證，可以有效減緩手腕負擔，解決不良姿勢造成痠痛嘅威脅。

ERGO K860仲配備埋一個三層式手托，呢個手托嘅面層係0.5mm嘅針織面料，可以為用家提供順滑嘅觸感，而第二層就係2mm嘅高密度海棉，用於平均分擔壓力，到最後一層就係4mm嘅記憶海綿，目的係為用家增強輕鬆感同舒適感。用咗一段時間後，感覺係佢嘅承托力都好足夠，長時間打字都唔會話好攰，隻手無使用普通鍵盤咁酸軟。除此之外，佢背面亦都有個兩段式可調整支架，用家可以根據自己習慣調較啱角度，咁使用時就會更加就手同舒服。

呢個鍵盤採用無線連接方式，支援藍牙同Unifying連線，接收範圍可達10米，無論Mac定Windows都無問題。佢仲可以同時配對三部裝置，用家只要使用Easy-Switch功能，即係呢三粒制，就可以係三部裝置之間切換。另外，佢擁有PerfectStroke按鍵系統，用於幫助用家喺微曲嘅按鍵上都可以輸入準確內容，認真細心。

電量方面，ERGO K860只需要兩粒3A電池就可以驅動，喺正常使用情況下，呢兩粒3A電可以有長達兩年嘅續航力，令用家唔使再擔心要經常換電。

呢款ERGO K860人體工學無線鍵盤香港已經有售，售價為HKD$1,199。對於要追求便利、舒適度、或者需要長時間使用鍵盤嘅人嚟講，的確係一個好選擇。