小米早前就發佈咗全新嘅小米降噪耳機 FlipBuds Pro，係小米旗下首款加入主動降噪功能嘅無線藍牙耳機，今日就同大家介紹下！

喺外觀上，佢採用鏡面奈米NCVM鍍膜工藝技術，體現出獨特嘅線條同光澤感，同時亦有良好嘅質感同觸感。佢搭載 11mm 超線性動圈，加上0.6mm 嘅大振幅，可以帶嚟渾厚嘅低音同埋更好嘅動態。另外，佢採用複合高回彈定新支片設計，同參考咗高階音響嘅結構，為耳機注入咗更強勁嘅聲音延展同控制力，再透過 LCP 液晶複合振膜單元高度還原音樂，令中高頻有更好嘅音質。

小米降噪耳機 Pro 支援最高 40dB 嘅主動降噪，擁有 3 段主動降噪模式，包括航旅、日常、同辦公，使用者可以喺唔同嘅環境下切換模式，達至最佳嘅降噪效果，而佢嘅聲短路防閉塞設計，可以為使用者減輕耳壓帶嚟嘅不適感，認真貼心。同時，佢亦都支援通透模式，加上用家可以單獨設定「人聲增強」功能，保持耳機外嘅人聲更加清晰，等日常戴住耳機嘅時候都可以同外界溝通暢順。

喺通話上面，小米降噪耳機Pro配備咗三組收音咪，並使用高通 QCC5151 旗艦晶片，能夠精細處理外部環境聲同語音，精準捕捉人聲，令通話質素更佳。

小米降噪耳機Pro 喺開啟主動降噪模式下，電量可以連續播放 5 小時音樂，而喺關閉主動降噪模式下，可以連續播放 7 小時音樂，連同充電盒可以做到最高 28 小時嘅續航力。

呢隻耳機已經喺中國大陸市場開始預售，售價為 RMB799，至於香港發售詳情就要等待官方宣佈。