小米喺 2019 年都算動作多多，繼先前發佈嘅外曲面手機同埋 5G 手機之後，近嚟又發佈咗以一億像素拍攝掛帥嘅全新手機小米 CC9 Pro，今日就同大家介紹吓。

小米 CC9 Pro 後置主鏡影相喺 Dxomark 嘅評分高達 121 分，係現時得分最高嘅手機之一。呢部機後置 5 個唔同功能嘅鏡頭，當中最矚目嘅係支援一億像素、四軸光學防震嘅主鏡頭，另外四個鏡頭分別係 2000 萬素嘅廣角、1200萬像素嘅人像、支援 10 倍混合光學變焦嘅長焦距同埋一個微距鏡頭，唔只咁喎，為咗有最佳嘅拍攝效果，
手機仲配備兩支柔光同兩支閃光鏡頭，官方號稱係可以取代專業相機嘅手機。

小米喺官方網亦都展示咗五個鏡頭嘅變焦威力，喺 2 倍光學、10 倍混合變焦同埋 50 倍嘅數碼變焦拍攝下，可以清楚咁拍攝1公里以外嘅地鐵站，你都咪話唔犀利。

另外，CC9 Pro 嘅人像鏡頭亦都支援兩點對焦同埋背景虛化演算技術，令拍攝出嚟嘅人像更接近肉眼睇到嘅景象。而夜拍亦都有驚喜，唔只可以喺暗黑嘅環境入面拍攝，透過 RAW 域高精算法，將本來曝光過度嘅地方都拍到細節位，可見呢部絕對唔係只追求數字咁簡單嘅手機！

CC9 Pro 亦都配備咗 3200 萬像素嘅前置鏡頭，加入咗 AI 美顏同前置弱光人像技術，Selfie 同埋自拍短片都一樣可以保持咁高質素。

講番部機嘅硬件本身先，小米 CC9 Pro 定位係中階手機，採用嘅係高通 Snapdragon 730G 處理器，配合 6-8GB 嘅記憶體，操作上絕對暢順有餘。電量方面，亦都配備 5260mAh 電池，支援 30W 嘅快充，半個鐘就可以幫手機由零充到 58% 嘅電力，相信要用外置電池嘅機會就唔大喇！而手機採用咗雙曲面 6.47 寸 AMOLED 嘅屏幕，第一眼真係有啲似對手華為嘅旗艦手機，唯一要留意嘅，係 CC9 Pro 重 208 克，唔算輕手㗎！另外，佢支援 NFC 同埋光學屏下指紋辨識技術，而 3.5mm 嘅耳機位亦都得以保留，咁齊技術喺中階機嚟講真係近來少見。

小米 9 Pro 喺內地即日接受預定，11月內就會正式推出，價錢相當親民，由 $2799 人民幣起，絕對係平玩1億像素嘅手機！顏色方面就有魔法綠境、冰雪極光同埋暗夜魅影3款。香港同東南亞地區就未有上市嘅消息，不過相信會同之前 CC 系列嘅手機一樣，以另一個國際版嘅型號同大家見面。

《Z世代達人》
麥卓華