香港5G手機太貴？ 呢個情況好快會改寫！小米即將在香港推出 小米10 Lite 5G手機，預期賣價港幣兩千幾，用上唔錯嘅高通Snapdragon 765G 處理器，你又會唔會入手呢？

之前都介紹過中低價位嘅 5G 手機，但香港一直都未推出行貨，呢個局面即將會唔同喇！因為小米透過官方嘅 IG 透露，將會喺 2020 年 6 月，喺香港推出之前發佈嘅 Mi 10 Lite 5G 手機，根據海外嘅定價，同埋我哋收到嘅消息，賣價應該都係二千中至尾左右，配置又係點呢？

小米 10 Lite 採用嘅係高通 Snapdragon 765G 處理器，雖然唔係頂級嘅 U，不過7系嘅處理器性能亦都相當高，一般日常使用，甚至打機都唔成問題。屏幕用上咗 6.57 寸 AMOLED True Color 20:9 嘅水滴屏，支援屏下指紋辨識技術，亦都支援人工智能面容解鎖功能。手機支援最新嘅 5G 技術，不過就未有支援 n79 頻段，就算 CSL 同埋中國移動香港，喺 5G 結界區用咗呢個頻段補足，呢部機都用唔到喇！不過又唔係咁大問題嘅，因為香港各大電訊商都準備用現有嘅 4G頻譜以 DSS 或者 Refarm 嘅技術加強覆蓋，呢部機正好支援n1、n3 同埋 n7頻段，而且有 4.5G 作為強大嘅後盾，相信影響唔會太大。

相機方面，小米 10 Lite 配置咗共 4 個包括 4800 萬像素嘅主鏡、800 萬像素嘅超廣角、200 萬像素嘅景深、同埋 200 萬像素嘅微距鏡頭，屬中上級數，不過就唔支援光學變焦。睇返官網嘅試相，效果唔錯，微距同埋夜拍都有幾好嘅表現。另外，小米 10 Lite 配置咗 1600 萬像素嘅前置鏡頭，支援 HDR，亦都加入咗流行嘅 120fps 慢動作拍攝功能㗎！

Mi 10 Lite 保留咗 3.5mm 嘅耳機插，亦都加入咗 NFC 功能，以及支援紅外線發射，方便配合應用程式控制屋企嘅電器。4160mAh 嘅電量，絕對足夠一日使用，亦都支援 20W 有線快充技術，俾你喺低電量嘅時候都可以快速叉電。

相信 Mi 10 Lite 嘅推出，5G 服務喺香港將會進一步普及，如果你一向用緊中階性價比高嘅手機，呢部 Mi 10 Lite 5G，唔知會唔會係你嘅選擇呢？

《Z世代達人》
麥卓華
redmi 10x 5g redmi 10x pro mi note 10 lite xiaomi mi note 10 lite