Xiaomi小米喺稍早時間就推出咗小米手環6，今日就等我哋做個開箱睇下！

小米手環6配備咗 1.56 吋嘅 AMOLED 觸控式屏幕，比上一代嘅1.1吋屏幕加大咗接近50%，令用家可以一次過喺手環上睇到更多資訊。呢隻手環喺使用上亦都好簡單，用家只要透過手機使用「小米運動」呢個應用程式，就可以為手環進行詳細設定、同查看各類健康數據等等。

呢款手環擁有5 ATM防水等級，支援 50米防水，無論落雨或戴住去游水都完全冇問題。同時，佢支援至少30種運動模式，例如籃球、拳擊、羽毛球同跳繩等等，用家只要選擇返相應嘅運動，佢就會為用家記錄運動時間、心率同卡路里消耗等等數據。佢仲可以自動偵測健步、戶外跑步同踩單車等6種運動，萬一用家唔記得開啟運動模式，手環都會自動記錄低呢6種運動嘅數據，認真貼心！

小米手環6亦加入血氧檢測功能，用家除咗可以於日常或運動時隨時檢測血氧飽和度之外，喺夜晚訓覺時亦都可以配合埋心率監測功能，得出一份睡眠分析報告。另外，小米手環6仲有提供心率異常提醒、個人活力指數、壓力監察等功能，協助用家提升自身健康。

小米手環6採用磁吸式充電，正常使用嘅話可以有14日續航力，而重度使用就可以有5日續航力，絕對夠晒用！

小米手環6喺香港已經公開發售，黑色版本價格為HKD$299，呢個價可以買到一隻有咁多運動模式，又有血氧、心率檢測等功能嘅手環，真係好抵玩！