小米喺早前分拆咗紅米 Redmi 成為獨立品牌，突顯高性價比嘅路線，頭炮推出咗 Redmi7。好多觀眾都問點解唔開箱呢部手機，好啦，今日就等我做一次簡單嘅開箱！

我手上面嘅紅米7係台灣嘅行貨，3GB 記憶體配備 32GB 內存，而除咗主機之外，包裝入邊仲有手機針，茶色嘅塑膠手機套，充電線同埋一個基本嘅5V/2A充電器。等我搣咗張招紙，跟住就爆機喇。

可能因為使用入門級嘅處理器高通632嘅關係，爆機明顯慢過較高階嘅手機，不過都唔算唔流暢。好啦，等我入張 Sim 卡先，拮開個SIM卡槽，有驚喜喎！Redmi7 用嘅係真三咭嘅設計，即係可以同時放兩張 SIM 卡同埋一張記憶卡，咁內存得 32GB 都有補救嘅辦法啦！

跟住我哋試吓上網先。體驗唔錯喎，用 Chrome 瀏覽器睇 MeeeepMore 嘅網頁，又快又順，比像中好好多，而且睇片都即 Load 即有，入門基本嚟講絕對收貨。等我試埋睇新聞片先，用無綫新聞 app 下面走馬燈新聞列都冇起格同窒吓窒吓，對比一兩年前嘅入門機，真係有明顯嘅改進！

即管試吓安兔兔嘅跑分先！分數大約有 100,000 分左右，對比番其他手機，Redmi7排名都算落後，不過當然啦，呢部只係一千元到嘅手機，不過就比我發現，佢嘅分數比三星A系列幾部價錢更高嘅手機仲要好，大家可以留意下喇！

又到影相嘅部份喇！Redmi7 配備兩個主鏡頭，包括1200萬像素嘅主鏡同埋一個200萬像素嘅景深鏡頭。日間光線充足，影出嚟嘅相當然問題不大，好！等我試埋夜晚先，呢幾張都係夜晚開咗AI模式嘅相，唔算得上好靚，但係最少影到大部份嘅景物。Redmi7 AI 模式係會自己偵測到場景，好似我影夜晚嘅相，你會見到AI嘅標示會變咗做月亮，都算方便。

總括嚟講，呢部 $1000 港幣左右嘅手機，作為公事用嘅 Second Phone 出吓訊息，或者俾外傭姐姐同埋屋企嘅老人家當一般機用都係唔錯嘅選擇。

《Z世代達人》
麥卓華