大家屋企或者公司唔知會唔會有啲未壞但運作極慢嘅電腦呢？ 其實有時用來上下網或者做下文件，屋企有部電腦的確方便好多，不過部機咁慢，可以點搞？ 今日就同大家睇下！

今次嘅主角就係固態硬碟SSD喇，近年SSD嘅價錢不斷下跌，好似我呢個500GB嘅SSD，都只係大概400蚊左右，價錢都算合理。而今日要升級嘅，就係呢部買咗七、八年嘅HP 4520 手提電腦喇！呢部機開個word都要成分鐘，唔upgrade就真係要買過部先得喇。今日介紹呢個upgrade嘅方式，唔駛重新安裝過Windows同埋相關driver，點做法呢？首先，你要將新嘅SSD暫時裝落一個2.5寸外置Harddisk盒入面，而用緊嘅電腦，就要Download呢個 EaseUS TODO Backup 嘅免費版。下載同埋安裝咗之後，打開呢個程式，之後按左面嘅 Clone 選項，揀番來源係舊電腦Harddisk入面嘅所有Drive，而目的地就係下面嘅SSD喇。由於今次用緊SSD做新Harddisk，你可以揀埋下面「進階選項」入面嘅「優化固態硬碟」嘅選項。最後就多次確認，現有harddisk上面嘅系統同埋所有資料都會好似影印咁抄晒過去新買嘅SSD，不過呢個步驟就唔算太快，以我Harddisk有百多GB料計算，大概抄咗3個小時左右。

抄完，就到換Harddisk嘅時間喇！由於大家用嘅電腦都唔同，呢個部份我就唔細咁講喇，主要係要打開機身，將舊有Harddisk拎出來，再換上新嘅Harddisk。如果你好似我咁係用緊手提電腦，建議你上網搵下同型號電腦拆機身換Harddisk嘅片段及方式，以免整壞部機！

好喇，換完Harddisk，我地再開一次部電腦。入Windows時已經感覺快咗。開埋個 Word 試下先… 睇下！唔駛10秒就開咗出來，今次呢個起死回生法，果然有效！

希望你鐘意我今次嘅介紹！記得Subscribe我哋 MeeeepMore嘅Facebook專頁同Youtube頻道，同埋Alfred Mak 嘅Facebook專頁！今集講住咁多先，再見！

Z世代達人
麥卓華